అనన్య న్యూస్, హైదరాబాద్: మనం బీసీలం.. బ్యాక్ వర్డ్ కాదు.. అన్నిట్లో సత్తా చాటగలం.. ఆత్మన్యూనతా భావంతో బ్రతకవద్దు ఆత్మగౌరవంతో బ్రతుకుదాం, ఐక్యతతో ముందుకు పోదామని హుజురాబాద్ ఎమ్మెల్యే, బీజేపీ ఎన్నికల నిర్వహణ కమిటీ చైర్మన్ ఈటెల రాజేందర్ అన్నారు. భారతీయ జనతా పార్టీ తెలంగాణ ఎన్నికల నిర్వహణ కమిటీ చైర్మన్ గా ఎన్నికైన ఈటల రాజేందర్ ను బీసీ సమాజ్ ఆధ్వర్యంలో ఆదివారం నాగోల్ శుభం కన్వెన్షన్ హాల్ లో ఘనంగా సన్మానించారు. ఈ సందర్భంగా ఈటల రాజేందర్ మాట్లాడుతూ డాక్టర్ బి.ఆర్ అంబేద్కర్ రాజ్యాంగపరంగా కల్పించిన ఓటు హక్కు ఒక ఆయుధం అని, ఉన్న వారు లేని వారు ఎన్నికల సమయంలో ఓటు కోసం వచ్చేవారికి సరియైన సమాధానం చెప్పాలన్నారు.
అందరం ఐక్యంగా ఉంటూ బీసీల రాజ్యాధికారం కోసం కృషి చేయాలన్నారు. నా జీవిత తెరిచిన పుస్తకం లాంటిదని, అధికారం ఉన్నా లేకున్నా ప్రజాస్వామ్య పరిరక్షణ కృషి చేస్తానని తెలిపారు. హాస్టల్లో చదువుకొని కష్ట సుఖాలు అనుభవించిన వాడీనని ప్రజా సమస్యల పరిష్కారానికి కృషి చేస్తానన్నారు. పార్టీ మారుతానని అసత్య ప్రసారాలు చేస్తున్నారని, ఒక వ్యక్తిత్వం గల వ్యక్తినని నా మీద పెట్టుకున్న నమ్మకాన్ని ఇట్టి పరిస్థితులలో వమ్ము చేయనని అన్నారు.
రాష్ట్రంలో వరదలు తో ప్రజల ప్రాణాలు పోయిన ప్రభుత్వం పట్టించుకోవడం లేదన్నారు. రాష్ట్రంలో విపత్తుల పై కేంద్రానికి నివేదిక పంపిస్తే కేంద్ర ప్రభుత్వం విచారణ కమిటీని వేసిందన్నారు. రాష్ట్రంలో కుటుంబ పాలన కొనసాగుతుందని సీఎం కెసిఆర్ ను ఎవరు నమ్మే పరిస్థితుల్లో లేరని రానున్న ఎన్నికల్లో బిజెపికి ప్రజలు పట్టం కట్టేందుకు సిద్ధంగా ఉన్నారని ధీమా వ్యక్తం చేశారు.
