అనన్య న్యూస్: మే 31 న ప్రపంచ పొగాకు వ్యతిరేక దినోత్సవం (No Tobacco Day). పొగాకు వినియోగాన్ని తగ్గించడానికి సమర్థవంతమైన విధానాలను సూచించడానికి ప్రపంచ ఆరోగ్య సంస్థ (WHO) నేతృత్వంలో పలు కార్యక్రమాలను చేపడుతున్నారు. పొగాకు వ్యతిరేక దినోత్సవ లక్ష్యం ధూమపానం, పొగలేని పొగాకు ఉత్పత్తులతో సహా పొగాకు వాడకం వల్ల కలిగే ఆరోగ్య ప్రమాదాల గురించి ప్రజలకు అవగాహన కల్పించడం. ఇది పొగాకు మానేయడం ప్రాముఖ్యతను గుర్తు చేస్తుంది. పొగాకు వినియోగానికి వ్యతిరేకంగా చర్య తీసుకోవడానికి ప్రభుత్వాలు, సంస్థలు వ్యక్తులను ప్రోత్సహిస్తుంది.
పొగాకు నియంత్రణను ప్రోత్సహించడానికి ప్రపంచవ్యాప్తంగా వివిధ కార్యకలాపాలు, ప్రచారాలు నిర్వహించబడతాయి. ఈ కార్యక్రమాలలో ప్రజల అవగాహన ప్రచారాలు, పాఠశాలలో, కమ్యూనిటీలలో కార్యక్రమాలు, ఆరోగ్య పరీక్షలు నిర్వహించనున్నారు. పొగాకు వినియోగం వల్ల కలిగే ప్రమాదాల గురించి ప్రజలకు తెలియజేయడం, యువత పొగాకు అలవాట్లను ప్రారంభించకుండా నిరోధించడంపై దృష్టి కేంద్రీకరించబడింది.
ప్రపంచ ఆరోగ్య సంస్థ యొక్క సభ్య దేశాలు 1987లో వరల్డ్ హెల్త్ అసెంబ్లీ డబ్ల్యూహెచ్ఏ (WHA) 40.38 తీర్మానాన్ని ఆమోదించింది. ఏప్రిల్ 7, 1988న ప్రపంచ ధూమపాన నిరోధక దినంగా పాటించాలని మొదట పిలుపునిచ్చారు. ఆ తర్వాత 1988లో డబ్ల్యూహెచ్ఏ (WHA) 42.19 తీర్మానం ఆమోదించింది. అప్పటి నుంచి 42.19 తీర్మానం ప్రకారం ప్రతి సంవత్సరం మే 31న ప్రపంచ పొగాకు వ్యతిరేక దినోత్సవాన్ని జరుపుతున్నారు.
