– శ్రీ శోభాకృత్ నామ ఉగాది పండుగ.
ఉగాదిలో ఉగ అంటే నక్షత్ర గమనం. నక్షత్ర గమనానికి ఆది ఉగాది అంటే సృష్టి ఆరంభమైన దినమే ఉగాది. యుగం అనగా ద్వయం లేదా జంట అని అర్థం. ఉత్తారయణ, దక్షిణాయణ ద్వయ సంయుతం యుగం కాగా.. ఆ యుగానికి ఆది యుగాదిగా మారింది. ఉగాది శబ్దానికి ప్రతిరూపంగా ఉగాదిగా రూపొందింది.
అనన్య న్యూస్: ఉగాది అంటే అందరికి గుర్తుకు వచ్చేది తెలుగు వారి పండుగ. తెలుగు సంవత్సరం ఈ రోజు నుంచే ప్రారంభ మవుతుంది. కాబట్టి ఇది తెలుగు వారి పండుగ గుర్తింపు తెచ్చుకుంది. చైత్ర శుద్ధ పాడ్యమి నాడు వచ్చే ఈ పర్విదినానికి ఎంతో ప్రాముఖ్యత ఉంది. ఈ నూతన సంవత్సరంలో రాశిఫలాలు, గ్రహస్థితులు ఎలా ఉన్నాయో తెలుసుకొని గ్రహశాంతులు లాంటివి జరిపించుకొని సుఖంగా ఉండేందుకు పంచంగ శ్రవణాన్ని చేస్తారు. మరికొన్ని గంటల్లో శ్రీ శుభకృత్ నామ సంవత్సరానికి ముగింపు పలికి శ్రీ శోభ కృత్ నామ సంవత్సరానికి స్వాగతం పలకనున్న నేపథ్యంలో ఉగాది విశిష్టత, చరిత్ర గురించి ఇప్పుడు తెలుసుకుందాం.
అనన్య న్యూస్ ప్రత్యేక కథనం:
పురాణాల ప్రకారం చైత్ర మాసం శుక్లపక్షం పాడ్యమి రోజున ఆ బ్రహ్మదేవుడు ఈ జగత్తును సృష్టించాడని నమ్ముతారు. సోమకుడు వేదాలను తస్కరించిన కారణంగా మత్సావతారం ధరించిన విష్ణువు అతడిని సంహరించి వాటిని తిరిగి బ్రహ్మదేవుడికి అప్పగించిన సందర్భంగా ఉగాది ఆచరణలోకి వచ్చిందని పురాణప్రతీతి.
చైత్ర శుద్ధ పాడ్యమి రోజున సూర్యోదయ వేళలో బ్రహ్మ దేవుడు సృష్టిని సృష్టించాడని అంటారు. అంటే కాలగణాన్ని గ్రహ, నక్షత్ర, రుతు, మాస వర్ష, వర్షాధికులను బ్రహ్మదేవుడు ఆ రోజు వర్తింప జేస్తాడని నమ్మకం. అంతేకాకుండా వసంత రుతువు కూడా ఈ రోజు నుంచే ప్రారంభమవుతుంది. అందుకే నూతన జీవితానికి నాందిగా ఉగాది పండుగను జరుపుకుంటారు.
శాలివాహనుడు పట్టాభిషక్తుడైన ఈ రోజు ప్రాశస్త్యంలోకి వచ్చిందని మరో గాధ ఉంది. ఉగాది, యుగాది అనే రెండు పదాలు వాడుకలో ఉన్నాయి. ఉగ అంటే నక్షత్ర గమనం. నక్షత్ర గమనానికి ఆది ఉగాది అంటే సృష్టి ఆరంభమైనదినమే ఉగాది. యుగం అనగా ద్వయం లేదా జంట అని అర్థం. ఉత్తారయణ, దక్షిణాయణ ద్వయ సంయుతం యుగం కాగా ఆ యుగానికి ఆది యుగాదిగా మారింది. ఉగాది శబ్దానికి ప్రతిరూపంగా ఉగాదిగా రూపొందింది.
ఉగాది పచ్చడి ప్రాముఖ్యత:
ఉగాది పండుగ అంటేనే అందరికీ గుర్తొచ్చేది ఉగాది పచ్చడి. ఉగాది పండుగ రోజు ఈ ఉగాది పచ్చడికి ఎంతో ప్రాముఖ్యత. ఆరు రుచుల సమ్మేళనమే ఈ ఉగాది పచ్చడి. ఈ పచ్చడిలో ఉండే ఆరు రుచులు మన జీవితంలో ఎదుర్కొనే అన్ని అనుభవాలను సూచిస్తుంది. ఇందులో వాడే ఒక్కో రుచి మన జీవితంలో జరిగే ఒక సంఘటనకు ప్రతీకగా భావిస్తారు. అందుకోసమే ఉగాది పండుగకు ప్రత్యేక నైవేద్యంగా ఉగాది పచ్చడిని తయారు చేసుకుంటారు. మరి ఈ పచ్చడిలో ఉపయోగించే ఆరు రుచులు దేనికి ప్రతీకనో ఇక్కడ తెలుసుకుందాం..
- బెల్లం తీపి మన జీవితంలో జరిగే ఆనందానికి ప్రతీక.
- చింతపండు పులుపు జీవితంలో అన్ని విషయాలలో ఎంతో నేర్పుగా ఉండాలని సూచిస్తుంది.
- ఉప్పు జీవితంలో ఎంతో ఉత్సాహంగా రుచిని తెలియజేస్తుంది.
- పచ్చి మామిడి ముక్కలు వగరు- మన జీవితంలో ఎదురయ్యే కొత్త సవాళ్లను అధిగమించడానికి ప్రతీక.
- కారం సహనం కోల్పోయే పరిస్థితులను ఎదుర్కోవడం
- వేపపువ్వు-చేదు-జీవితంలో బాధలు కలిగించే అనుభవాలకు గుర్తు.
ఈ విధంగా ఆరు రుచులతో కలిపి ఉగాది పచ్చడిని తయారు చేసి దేవుడికి నైవేద్యంగా సమర్పించి, కుటుంబ సభ్యులు ఈ పచ్చడిని ప్రసాదంగా భావించి సేవిస్తారు..
