అనన్య న్యూస్, హైదరాబాద్: తెలంగాణ పదో ఆవిర్భావ దినోత్సవం వేడుకలకు రాష్ట్ర ప్రభుత్వం సర్వం సిద్ధం చేసింది. జూన్ 2న రాష్ట్ర ఆవిర్భావ వేడుకలను రాష్ట్ర ప్రభుత్వం అత్యంత ఘనంగా నిర్వహిస్తోంది. ఇందుకోసం భారీగా ఏర్పాట్లు చేస్తోంది. ఈ వేడుకలకు హాజరుకావాలని కాంగ్రెస్ నేత సోనియా గాంధీ, మాజీ సీఎం కేసీఆర్, మాజీ ఎమ్మెల్సీ చుక్కా రామయ్యతో పాటు పలువురు ప్రముఖులకు ప్రభుత్వం ఆహ్వానం అందజేసింది. ఇటు సోనియాగాంధీ కూడా ఈ వేడుకలకు హాజరవుతున్నట్లు ఇప్పటికే ప్రభుత్వానికి సమాచారం అందింది.
గన్ పార్క్ లోని తెలంగాణ అమరవీరుల స్మారకం వద్ద ఉదయం 9.30 కు ముఖ్యమంత్రి ఏ. రేవంత్ రెడ్డి పూలతో శ్రద్ధాంజలి ఘటించనున్నారు. సికింద్రాబాద్ లోని పరేడ్ గ్రౌండ్ లో ఉదయం 10 గంటలకు ఆయన జాతీయ పతాకాన్ని ఆవిష్కరించ నున్నారు. రాష్ట్ర పోలీసు దళాల గౌరవ వందనాన్ని కూడా స్వీకరించనున్నారు. ఈ సందర్భంగా ఆయన తెలంగాణ రాష్ట్ర గీతాన్ని కూడా ఆవిష్కరించనున్నారు.
ఆ తర్వాత కాంగ్రెస్ నాయకురాలు సోనియా గాంధీ, ముఖ్యమంత్రి రేవంత్ రెడ్డి జనాన్ని ఉద్దేశించి ప్రసంగించనున్నారు. ఆ తర్వాత పోలీసు అధికారులకు అవార్డులు అందించనున్నారు.
సాయంత్రం ట్యాంక్ బండ్ వద్ద హ్యాండ్లూమ్, ప్రత్యేక ఉత్పత్తుల స్టాల్స్, ఫుడ్ కోర్ట్స్, తెలంగాణ వంటకాలు సందర్శకులను ఆకట్టుకోనున్నాయి. ట్యాంక్ బండ్ వద్ద ఉన్న స్టాల్స్ ను ముఖ్యమంత్రి సాయంత్రం 6.30కు సందర్శించనున్నారు. తర్వాత జరిగే సాంస్కృతిక కార్యక్రమాలలో దాదాపు 700 మంది కళాకారులు పాల్గొననున్నారు. ట్యాంక్ బండ్ వద్ద ఫ్లాగ్- వాక్ నిర్వహించ నున్నారు. ఈ సందర్భంగా ‘జయ జయహే తెలంగాణ’ అనే రాష్ట్ర గీతాన్ని 13.5 నిమిషాల పాటు వినిపించనున్నారు. ఈ పాటను తెలంగాణ కవి అందెశ్రీ లిఖించారు. సంగీత దర్శకుడు కీరవాణి బాణిని సమకూర్చారు.
