- జూన్ 2న రాష్ట్ర అవతరణ దినోత్సవంతో పాటు మరో ఘనత.
- 9 ఏండ్ల పాటు పాలించిన తెలుగు సీఎంగా కేసీఆర్ రికార్డు.
- 24 మంది తెలుగు సీఎంలలో ఎవరికి దక్కని కీర్తి..
అనన్య న్యూస్, హైదరాబాద్‌: 2023 జూన్ 2న తెలంగాణ పదో పుట్టిన రోజు మాత్రమే కాదు, మరో విశేషం ఉంది. అది ఒక తెలుగు నాయకుడు ఒక రాష్ర్టానికి, నిరంతరాయంగా, ఏకబిగిన అత్యధిక కాలం ముఖ్యమంత్రిగా కొలువుదీరి రికార్డు సృష్టిస్తున్న సందర్భం కూడ, స్వాతంత్య్రానికి పూర్వం మద్రాసు ప్రెసిడెన్సీ, మొన్నటి ఉమ్మడి మద్రాసు రాష్ట్రం, హైదరాబాద్‌ స్టేట్‌, నిన్నటి ఉమ్మడి ఆంధ్రప్రదేశ్‌, నేటి తెలంగాణ, ఏపీ (విభాజిత) రాష్ర్టాల దాకా ఎక్కడ చూసిన ఒక తెలుగు నాయకుడు గ్యాప్‌ లేకుండా, ఏకబిగిన, ఇంత సుదీర్ఘ కాలం, ఒక రాష్ర్టానికి ముఖ్యమంత్రిగా ఉండటం చరిత్రలో ఇదే మొట్టమొదటిసారి. ఈ రికార్డును సృష్టిస్తున్న ముఖ్యమంత్రి చంద్రశేఖర్‌ రావు.
2014 జూన్ 2న ముఖ్య మంత్రిగా ప్రమాణ స్వీకారం చేసిన కేసీఆర్ 2023 జూన్ 2తో తొమ్మిదేండ్ల పదవీ కాలాన్ని దాటనున్నారు. దేశానికి నడిబొడ్డున ఉన్న తెలంగాణ, దశాబ్ది సంబురాలు జరుపుకొంటున్న సమయంలో, కేసీఆర్ ఈ సరికొత్త రికార్డును సృష్టిస్తుండడం, మన భూమి పుత్రుడికి దక్కిన విశేష గౌరవం. తెలంగాణ ప్రజలకు గర్వకారణం, ముఖ్యమంత్రులుగా పనిచేసిన తెలుగువారిలో, అత్యధిక కాలం ఆ పదవిలో ఉన్న రికార్డు టీడీపీ నేత చంద్రబాబు నాయుడు పేరిట ఉండగా, ఆయన మూడు విడతల్లో మొత్తం 13 ఏండ్ల 247 రోజుల పాటు సీఎంగా ఉన్నారు. అయితే ఆయన ఏకబిగిన ముఖ్యమంత్రిగా కొనసాగింది మాత్రం 8 ఏండ్ల 256 రోజులు మాత్రమే! అది ఉమ్మడి రాష్ర్టానికి! ఉమ్మడి ఆంధ్రప్రదేశ్‌ రాష్ట్రంలో 2004లో జరిగిన ఎన్నికల్లో ఓడిపోయిన చంద్రబాబు, పదేండ్ల తర్వాత 2014లో విభాజిత ఆంధ్రప్రదేశ్‌ రాష్ర్టానికి సీఎం అయ్యారు. అంటే రెండు వేర్వేరు రాష్ర్టాలకు ముఖ్యమంత్రి అయ్యారన్న మాట! ఇప్పటిదాకా ఒక రాష్ర్టానికి ఏకబిగిన ముఖ్యమంత్రిగా చంద్రబాబు పేరిట ఉన్న 8 ఏండ్ల 256 రోజుల రికార్డును, ఈ జూన్ 2తో అధిగమించి, ముఖ్యమంత్రి కేసీఆర్ సరికొత్త చరిత్ర సృష్టించనున్నారు.
ఉమ్మడి ఆంధ్రప్రదేశ్‌ ముఖ్యమంత్రిగా.. కాసు బ్రహ్మానందరెడ్డి ఏడేండ్ల 221 రోజులు, చంద్రబాబునాయుడు ఎనిమిదేండ్ల 256 రోజులు, వైఎస్‌ రాజశేఖర్‌రెడ్డి ఐదేండ్ల 111 రోజులు పదవిలో కొనసాగారు. వీరందరి కంటే ఎక్కువగా, తెలంగాణ ముఖ్యమంత్రిగా చంద్రశేఖర్‌రావు ఈ జూన్ 2తో సరిగ్గా తొమ్మిది ఏండ్లను పూర్తి చేసుకోబోతున్నారు.
